Ficha 1: Presentación do recurso Quérote + en 3ºESO B

 

Hoxe, venres 29 de novembro de 2024 iniciouse o programa Quérote + co alumnado de 3º ESO B na aula de informática de bacharelato. 

En primeiro lugar, a titora, Guiomar Vázquez Nogueiras, introduciu a actividade comentándolle ao grupo que a educación afectivo-sexual é un dos contidos recollidos na LOMLOE, actual lei de educación. Por iso, ten sentido desenvolver este programa en 3º ESO. O obxectivo fundamental é que mozos e mozas aprendan a coñecerse, a aceptarse e a vivir a súa sexualidade dun xeito positivo e satisfactorio.

En segundo lugar, explicoulles que son os centros Quérote +, que información suministran, así como as principais vías de comunicación cos mesmos: 

- As consultas aos mesmos son anónimas e gratuítas.

- As temáticas sobre as que se poden plantexar cuestións son: sexualidade, benestar emocional, promocion do bo trato, prevención de ITS e de embarazos, así como diversidade LGTBIQ+.

- As vías de contacto son: presencial (en Ourense na rúa Celso Emilio Ferreiro, 27, 4º),  telefónica (988231470 ), a través da páxina web: (https://xuventude.xunta.es/querote-mais) , por WhatsApp ou Telegram no 647018752 ou por videochamada (a través de Falemos).

En terceiro lugar, o alumnado accedeu a páxina web e realizou unha consulta en liña a través do formulario “Formula a túa dúbida”

Tamén, se lles pediu que accedesen a ligazón Saber + , unha fonte rigorosa na que recabar información sobre sexualidade.

Por último, a docente, amosoulle o traballo desenvolto polos compañeiros e compañeiras o curso pasado e publicado neste blog.

Ficha 1: Presentación do recurso Quérote + en 3º ESO C

 

 

O grupo de 3 ESO C iniciou hoxe o programa Quérote+.

No classroom de titoría accederon ás fichas do programa e foron seguindo a introdución da profesora María de Toro González para presentar a xustificación e necesidade de educar no eido afectivo sexual para promover valores democráticos á vez que impulsar a autoestima e o bo trato cos demais.Analizaron a coherencia coa lei educativa e o carácter transversal destes contidos, que enlazan cos obxectivos de distintas materias(como Valores éticos  Bioloxía, Xeografía e Historia ou Educación física).

Despois, o alumnado accedeu á páxina web de Quérote + e mergullouse nas distintas temáticas nas que poden asesorar á mocidade(adicción, uso das redes sociais e internet, saúde mental e sexualidade). Entraron no apartado de "formular unha pregunta" tras cubrir certos datos anonimizados, e anotaron a clave para consultar a resposta nunhas semanas.

O alumnado detectou que nas preguntas que se lle formulan, faltan opcións para ter sentido, dado que se contestan que "non teñen relacións sexuais" non saben que contestar na pregunta de se usas preservativo.

Posta en marcha do programa Quérote + 2024-2025

Este curso por segundo ano consecutivo, desenvolvemos no noso centro o programa de educación sexual  Quérote +, dentro do Plan Proxecta + de innovación educativa, da Consellería de Cultura, Educación, Formación Profesional e Universidades en colaboración con outros organismos.

Os obxectivos que perseguimos coa realización do mesmo son:

• Que o profesorado dispoña de información e ferramentas para o traballo da educación sexual na aula.
• Estimular no alumnado unha autoestima positiva co obxecto de reducir a influencia da presión grupal.
• Educar en habilidades que favorezan a toma de decisións responsables para un mesmo e para a comunidade.
• Poñer en valor a diversidade e fomentar o seu respecto de cara a unha convivencia construtiva e harmónica.
• Achegar información en canto a situacións que poderían acontecer (seguridade no uso da tecnoloxía, prevención de embarazos, ITS, etc.)

Abordaranse tres contidos básicos:

• Educación sexual.
• Modelos de amor e de parella.
• Uso das tecnoloxías nas relacións.

Realizarase cos tres grupos de 3º ESO: A, B e C, nas materias de Bioloxía e Xeoloxía, Lingua e Literatura Galega, Física e Química, e Valores Éticos, así como en sesións de titoría. Consistirá na posta en marcha das oito fichas proporcionadas polo programa Quérote +, de novembro a xuño.

Todas as actividades desenvoltas polo alumnado serán publicadas neste blog.

Traballaremos:

• Ficha 1: Presentación do recurso Quérote +.
• Ficha 2: A educación sexual.
• Ficha 3: A orientación do desexo e a identidade sexual.
• Ficha 4: O modelo de amor romántico.
• Ficha 5: A relación dos sexos a través da tecnoloxía.
• Ficha 6: Cultivando habilidades.
• Ficha 7: Aconcepción e concepción.
• Ficha 8: Hoxe damos clase nós.

Podedes acceder as fichas premendo aquí

O profesorado que participa neste programa é:

• Patricia Beldrón González, docente de Lingua e Literatura Galega.
• María de Toro González, docente de Valores Éticos e titora.
• Iria González Vázquez, docente de Física e Química e titora.
•  María Ángeles Miranda Babarro, orientadora.
• Lourdes Vaz Justo, docente de Lingua e Literatura Galega.
• Guiomar Vázquez Nogueiras, coordinadora, titora e docente de Bioloxía e Xeoloxía.